جدى

نزلت فورا وفتحت باب البيت وخرجت, اتجهت بخوف كبير ناحية الأرض اللي كانت غرقانة في ظلام دامس, وعلى ضوء القمر قدرت أقرب شوية من الزريبة وبدأت أنادي على أختي..

يا قمر

يا قمرررر

بس ولا حياة لمن تنادي, فتحت باب الزريبة وانا ايدي بتترعش بخوف كبير عشان يطلع صوت عالي خلى جسمي يتلبش, فتحت كشاف الموبايل ودورت يمين وشمال في الزريبة بس ملقتش أي حاجة, اتحركت عشان أخرج من المكان بس وقتها سمعت صوت من ورايا, صوت شبيه بصوت البقرة, جسمي كله اتخشب مكانه لأني لسة شايفة المكان وكان فاضي..

ووقفت قدام الباب جسمي مشلول مش عارفة أتحرك, راودني نفس الاحساس اياه لما كنت جوة المشرحة, احساس ان حد بيراقبك أو ان فيه حضور في المكان, وفي زاوية الزريبة شوفت بقرة ضخمة معرفش ظهرت منين, ظهرت زي البنت بتاعت المشرحة ما ظهرت, بقرة عنيها حمرة زي الدم وبتبص ناحيتي بغضب شديد..

وبدأت تتحرك ناحيتي وانا في حالة من الفزع خلتني أتمنى أموت ولا انها تقرب مني القُرب ده كله, وقتها شوفت الجحيم, بقرة ضخمة بتزوم وعنيها حمرة, مكملتش اكتر من كدا لأني وقعت في غيبوبة..

أختي كانت في الحمام وانا من خوفي عليها افتكرتها خرجت, ولما رجعت ملقتنيش صحت والدي ودوروا عليا لحد ما لقوني مغمى عليا قدام الزريبة, يومها بكيت كتير أوي وحكيت لبابا ان المكان فيه شر ولازم يرجع الأرض لاصحابها..

وبابا كان بيثق في كلامي جدا بعد تجربتي الأخيرة واعتذر ورجع الأرض بالتراضي بعد ما خسر فيها مبلغ صغير, وبعد ما رجعها بتلت شهور ومن حد ثقة عرفنا ان الأرض دي حصلت فيها حادثة بشعة..

ابن الراجل اللي اشترينا منه الأرض كان بيحفر عن آثار, وفيه شيخ قاله ان المكان فيه آثار فعلا, وراح يحفر جوة الزريبة كل يوم بعلم والده, وقبل ما يوصلوا لباب المقبرة وابن الراجل في الحفرة ومعاه واحد حفار كانت فيه بقرة مربوطة جوة الزريبة معاهم قدرت تفك الحبك واتحركت عشان تقع جوة الحفرة عليهم تموتهم, يومها الراجل اتحرق على ابنه ودفن عليه هو والبقرة والراجل وادعى ان ابنه سافر..

بس هو من حسرته مقدرش يشتغل في الأرض تاني بعد ما ابنه مات فيها وقال يبيعها وكان حظنا اننا اللي اشتريناها, بس سبحان من خلانا نرجعها تاني لأني كنت حاسة اننا هتحصلنا مصيبة لو كملنا فيها..

وقتها حمدت ربنا كتير أوي, يمكن مريت بموقف صعب زمان كان السبب اني استشعر شر المكان ده, ويمكن مريت بموقف صعب تاني بس كان السبب اننا نهرب وننجى من شر المكان ده كله, وقتها اتأكدت ان مفيش شر في أي حاجة بتحصلنا وان أفعال ربنا كلها لينا خير، واننا ماشيين في الدنيا دي بأمر ربنا اللي في باطنه الرحمة حتى لو الظاهر لينا بنظرتنا القاصرة الألم، وافتكرت قول ربنا سبحانه وتعالى..

“والله يعلم وأنتم لا تعلمون”

“وعسى أن تكرهوا شيئا وهو خير لكم”

بقلم: أحمد محمود شرقاوي

……………

متنساش لو عجبتك القصة تعمل لاف وتعليق برأيك في كومنت..