طمع الأهل
السلام عليكم ورحمة الله وبركاته
انا زوجه وام عندي 30 سنه متجـ,ـوزة من 10 سنين زوجي اتوفي من 3 شهور
انا اتجوزت جوزي وكان لا يملك اي شئ حبيته واتجوزته ووقفت جنبه وجتله فرصه سفر بعد جوزنا بشهر سافر وسابني وبعد كدا سافرتله وعيشت معه علي المره قبل الحلوه ربنا رزقني منه ب 3 بنات والحق يتقال هو كان حنين وكويس وكان ونعم الزوج بس لاسف كنت كل مااقوله نعمل حاجه لمستقبل بناتنا او حتي لمستقبلنا خصوصا ان الغربه مش مضمونه مكنش بيسمع كلامي كان بيسمع كلام اهله وبس كان كلام ولدته مقدس بالنسبه له لدرجه ان كان يدوب يجيب احتياجاتنا وباقي الراتب يتبعت لاهله فضل يبعت لحد مااهله بنوا بيت العيله من فلوس غربته ولما كنت اتكلم كان يقولي عمر اخواتي مايكلوني
حصل ظروف واضطرينا ننزل من الغربه نزلنا طبعا مكنش معانا حاجه الا مبلغ بسيط معه وانا كنت بشتغل هنا وكان معايا مبلغ بالاضافه لدهبي كنت شرياه بفلوسي بردوا
نزلنا لقينا الوضع صعب جدا ولدته واخواته قاعدين في بيت العيله والدور التاني اخوه بيشطب فيه عشان يتجوزة فيه واحنا ملناش مكان حصلت مشاكل جامده وشتبمه واهانه ليا ولاهلي منهم لدرجه انهم طردونا في نص الليل لما اتكلمت وقولت هنعيش ازاي وفين وعاتبته علي غربتنا اللي من غير تمن وابسط حق ليا ولبناتي ان يبقي ليناشقه مستقله ومسكن خاص بينا.وروحنا اخدنا شقه بالايجار وساعاتها صممت اني يبقي ليا شقه بعيد عنهم لانهم بتوع مشاكل وزوجي ضغيف الشخصيه اقدامهم
زوجي قالي مش معايا فلوس اجيب شـ,ـقه
حطيت فلوس شغلي علي دهبي واشـ,ـتريت الشـ,ـقه. زوجي قعد فتره كبيره جدا مش لاقي شغل ومحدش كان بيساعده ولا حد وقف جنبه والكان بيديه حاجه كان بيفضح الدنيا رغم ان جوزي خيره علي الكل ولولاه مكنوش بنوا بيت ولا عملوا حاجه.
واخيرا جوزي لاقي شغل ويدوب شهريين واتوفي بقاله 3 شهور دلوقتي وانا مش عارفه اعمل ايه ولا اروح فين اهل جوزي عرضوا عليا اروح اعيش معهم في بيت العيله بحجه انهم ياخدوا بالهم من البنات معايا وقالولي اجري شقـ,ـتك واصرفي منها علي البنات والكلام دا عشان مطالبش بحقي ولا حق بناتي في البيت رغم اني ليا تلت البيت علي الورق ورغم ان جوزي هو اللي باني البيت بفلوس غربته
الوضع طبعا صعب جدا شقه قاعده فيا ام زوجي و2 شباب عزاب اللي هما سلايفي غير اخواتهم البنات اللي كل جمعه بعيالهم برجالتهم بيجوا يعني مش هيبقي فيه خصوصيه ولا حتي راحه ولا ليا ولا بناتي والبيت في قريه مش الفي المدينه
من ناحيه انا ولدي وولدتي متوفيين وليا اخين قاعدين في محافظه تانيه بيقولولي بيعي شقتك وتعالي خدي شقه جانبنا وباقي فلوس الشقـ,ـه اعملي مشروع اصرفي منه ومطالبيش اهل زوجك بحق عشان ماتخسريهمش مهما كان هما اهل زوجك واعمام بناتك
وانا حاليا محتارة ومش عارفه اعمل ايه اروح اقعد في تعب وشقي جوزي في بيت العيله رغم اني متأكده اني مش هرتاح ولا انا ولا بناتي
ولا اعمل زي مااخواتي قالولي واريح دماغي واسلم امري لله ومطالبش بحقي عشان ماخسرهمش
وللعلم انا شـ,ـقتي في محافظه بعيده عن اخواتي بحولي 4 ساعات وانا اهل زوجي ب2 ساعه يعني محدش جانبي ومعرفش حد في البلد الانا فيها خالص
ملحوظه اخيره انا مابفكرش في الزواج انا عاوزة اعيش واربي بناتي ومكتفيه بكدا
ياريت اسمع ارائكم وتعتبروني اخت ليكم وتنصحوني بأيه عشان الخطوه اللي هعملها دلوقتي هتفرق في الجاي بالنسبه ليا ولبناتي طول حياتهم وشكرا مقدما
